美麗華山球場解雇爭議袂收煞 員工今靜坐抗議

美麗華山球場,4月宣佈公司分割了後,共部份員工辭頭路,引起美麗華工會罷工。工會表示,本底7月有達成一部份的共識,毋過到今攏猶未簽訂團體協約,今仔日佇球場門口靜坐。毋過球場煞攏無出面回應。

美麗華山球場員工佇門口靜坐,等待美麗華資方的講法。美麗華資方佇今年4月雄雄宣布,共公司分割出成做三个事業單位,落尾閣解雇員工,引起工會罷工,到今已經超過80工。工會表示,原本7月22,資方有同意10工以內會提出員工的分割留用方案,但是到今是一直無簽訂團體協約。

美麗華企業工會理事長黃文正表示,「確認正職人員的人數,公司若是欲調降薪資抑是調職,愛佮工會協商,愛工會陪同,袂使像往過隨約談隨解雇。」

美麗華企業工會理事張鴻銘講,「阮是干焦佮資方委託的律師,講好遮的條文,嘛有初步達成共識,但是律師講閣愛轉去佮總公司協商,就是變成這馬一个崁,就是攏無回應。」

工會講,資方取消山球場內部的清潔部,總共8个清潔工人予解雇,其中一个因為經濟壓力、無參與罷工,到外包的清潔公司做工課,但是猶是佇美麗華山球場工作,成做美麗華山球場的外包清潔工人。

美麗華企業工會理事長黃文正說明,「公司講予in十工,予in考慮講遮的人員愛安怎,因為清潔人員予外包去,(若是轉來)可能需要安插佇別的部門,十工以內in會寫計畫書予阮,這馬嘛無。」

美麗華球場副總孫世雄向記者表示,公司7月22時,並無答應會佇10工以內提出分割留用方案,但是進一步的回應,公司猶閣佇咧研議。靜坐現場到下晡為止,嘛猶無資方人員出面回應。工會表示,呼籲資方緊出面簽訂團體協約,解決勞資雙方爭議,無會繼續抗爭落去。

全台敬老金大調查

相關新聞