南臺灣大雨致災 高雄桃源.六龜達水崩山警戒

濟濟黃色含塗佮石頭的水一直流落來，高雄六龜扇平山莊邊仔的這條產業道路規个淹去。工程人員講，「有塗石啦，有土石流，我這馬當咧整理，欲先予通車。 」

另外一爿的社區，仝款水是淹甲超過半个輾仔的懸度。當地居民講，「規个排水溝的水攏流對遮來，雨真大，落無歇睏。 」

受著西南氣流的影響，高雄落大水雨，氣象局表示，高雄山區有局部大水雨或者是超磅大水雨，以桃源區的雨量是上驚人的，24點鐘累積的雨量超過501毫米，桃源區4個里達到豪雨土石流紅色警戒，透早就開始撤離在地的居民。

較北爿的台南關廟，南雄橋邊仔蹛佇地勢較低的住戶，因為二仁溪水位雄雄漲起來，水深超過1公尺，民眾若欲出入著干焦會當暫時靠竹棑仔。當地居民表示，「淹到這馬已經真慣勢，橫直淹水，就共物件搬搬咧，有家己做的自製的竹棑仔，若欲出入通好暫時提來用。 」

抑若嘉義山區，嘛傳出有幾若的所在，車路崩塌的災情。竹崎鄉嘉159甲線32公里的所在，車路邊坡崩塌，大埔鄉茄苳村大路嘛必甲真食力。

新港鄉共和村傳出一對父仔囝蹛的工寮去予水淹去，兩个人若像受困佇內底。

當地居民表示，「遮規片攏是田，田地水若滿，就溢出來路的，看無路，嘛看無水溝仔。 」

毋過，消防隊到位了後，對方講工寮干焦蹛1个人，無需要協助疏散，若有狀況會家己去較懸的所在避難。