新港奉天宮防疫計畫通過 帶條件開放參拜
林緯廷 / 嘉義報導
發布時間：
更新時間：
國內疫情穩定，嘉義新港奉天宮防疫計畫已經通過，這馬已經開放民眾入廟內參拜。
總算會當入來廟內底拜拜，等二個外月的信眾感覺心情誠好。
民眾黃小姐:「感覺傷久無來矣，閣佇厝關欲二個月，出來透氣，然後來廟遮行行閣誠歡喜。」
民眾郝小姐:「感覺真歡喜，會當佮媽祖見面相會。」
嘉義縣新港奉天宮7月19提報予主管機關的防疫計畫，23審核通過了後，開放會當入去廟內底來拜拜。奉天宮表示，除了實聯制、磅體溫、定時消毒，閣愛人流控制、保持社交距離。
民眾楊小姐:「其實無清楚知影講今仔日有開放，只是拄仔好媽祖保庇，所以才會當入來。」
新港奉天宮董事長何達煌:「跋桮遮攏有酒精，阮跋桮，阮的服務人員每一點鐘攏會消毒一改、噴一改。」
因為疫情的關係，前進民眾來到遮，只會當佇臨時祭拜的所在拜拜。奉天宮講，對微解封彼工開始，信眾就一直希望廟方會當重閣開放。這馬防疫計畫已經開始執行，希望信眾會當佇安心閣安全的環境進行宗教活動。
