屏東群聚箍列者含1通緝犯 為閃警察覕佇山頂

屏東防止Delta變異病毒湠開，頂禮拜全屏東篩檢有上萬人，欲7百人列做隔離對象。其中也有一个通緝犯，伊覕去山頂的果子園，猶是予枋寮分局的警察揣著，而且彼時陣、伊有感冒症狀，佳哉篩檢了後是陰性。

防疫人員替警察佮予人掠著的通緝犯全身消毒，in每一个人攏穿防護衫，這位40外歲的陳姓男子因為竊盜案件被法院判刑通緝，嘛予屏東衛生單位箍列隔離，伊人煞覕去朋友的果子園，最後予枋寮分局警察揣著。枋寮分局偵查隊副隊長謝明邦表示，「因為這位通緝犯有感冒流鼻水的症頭，警方毋敢靠勢，除了全程穿防護衫，嘛通知衛生局全程協助。」

其實這擺Delta病毒疫調，被箍列煞失聯的民眾，是交予警方會同衛生人員四界走揣，枋寮警方負責29人，愛全部送檢疫所，佳哉落尾這位通緝犯篩檢結果是陰性。毋但警察佇防疫第一線真辛苦，閣有逐工天光就去篩檢站支援的人員，有人愛共無人顧的2个後生送去學校，甚至無閒甲袂記得家己的生日，佇面冊寫批共囡仔會失禮。

屏東縣民政處宗教禮俗科長黃啟原講，「無閒起來袂記得彼工生日，嘛袂記得下暗做伙食飯過生日，彼工囡仔佇厝內一直等一直等。」黃啟原的批，予真濟人知影防疫人員的心聲。面對Delta病毒，屏東10工攏總篩檢1萬2千外人，希望民眾配合防疫，毋通拍損防疫人員的辛苦。