新北市對五月底開始，揣長照服務車和桃園機場的運將，計共70外台。到今服務超過2500个市民去隔離，隔離煞閣共in(亻因)安全送轉去厝裡。這陣人號做「微光車隊」，看in(亻因)按怎佇疫情期間，照光烏暗路。
拄送確診者去集中檢疫所隔離，轉來到三重埔停歇站，新北防疫專車對車身到車內，攏愛斟酌消毒。運將講見擺出勤，攏有心酸故事。
新北微光抗疫車隊司機宋昌佑:「我載過一个少年仔，彼个少年仔伊上車，就講頭殼眩、想欲吐，我就講，好，我予你一跤塑膠橐仔，沿路吐到淡水我干焦會當案內in，盡量保持心情順暢。」
新北微光抗疫車隊司機朱先生:「予人隔離的人嘛是足無願意的，共in載轉去厝就是任務。」
社團法人臺灣計程車學院協會理事長侯勝宗:「所以一定愛揣著願意犧牲奉獻，而且是正面，心理能量足大的司機。」
新北市的防疫車隊，對5月21開始做防疫車隊到今已經服務個外月，服務超過2500外位的市民，出動超過600逝，嘛有欲倚90位司機投入防疫車隊。佇司機出勤津貼這部份，市政府也骨力相伨。
新北市衛生局專委陳玉澤:「目前是運用災難準備金的部份，來做這改服務的支應，原則上每一位司機準若逐工出，大概有3500的津貼。」