疫情期間濟寄養家庭退出 家扶設法線頂招募

防疫期間所有的活動攏暫停，屏東家扶中心今年有4戶寄養家庭欲退出，需要安置的囡仔雄雄增加。屏東家扶中心按算利用線頂說明會，招一寡熱心的民眾加入寄養家庭的行列。

三歲半的阿福，閣有寄養家庭的爸母，做伙透過網路，佮社工開講。疫情期間，屏東家扶中心減少訪視，嘛是愛了解寄養家庭的情形，而且這對退休的翁仔某，攏總照顧三个囡仔，實在是因為6歲以下需要安置的囡仔，這幾冬愈來愈濟，有時一个家庭愛照顧兩个幼囝。
  目前佇屏東家扶中心，有48戶寄養家庭，照顧74个囡仔，其中干焦24戶會當顧幼囝，今年煞有四戶家庭，因為年歲大想欲退出，疫情期間，一切宣傳攏無矣，袂當像往過去外口辦活動，毋過實在真欠寄養家庭，in想著用線頂來辦說明會。
  26的線頂說明會，屏東家扶希望年歲25以上，有收入而且厝內有空間的民眾，做伙來做寄養爸母，予遮的囡仔有一个安心成長的所在。