外籍機師注完疫苗通放冗檢疫? 陳時中:無規劃 | 公視新聞網 PNN

外籍機師注完疫苗通放冗檢疫? 陳時中:無規劃

臺灣這陣猶無承認國外注疫苗的記錄,邊境管控猶維持14工;毋過有風聲講大約有30位外籍機師,已經轉去故鄉注過2筒疫苗,入境臺灣猶是需要居家檢疫。毋過指揮官陳時中表示,國內外疫情猶是真嚴重,暫時無拍算改變防疫規範。

國內疫苗猶無夠,傳出袂少人已經飛去國外注疫苗,包括一寡國籍航空的外籍機師,也趁歇假轉去故鄉注,不過台灣猶無承認國外注射的紀錄,致使大約30位外籍機師就算已經注過莫德納和輝瑞2支疫苗,見擺轉來台灣攏愛居家檢疫7工、自主健康管理7工。
 
中央流行疫情指揮中心指揮官陳時中:「國外這馬這个時陣欲來開放,會小可仔煩惱相關的變種病毒,會佇社區發生予阮較僫掌控的一部份,雖罔阮進前捌想過,嘛有計畫過,毋過這馬國內疫情當咧緊張 ,阮先無做這款的考慮。」
 
考量國內疫情猶咧看守期,陳時中表示無放冗機組員防疫規定的拍算,加上國外變種病毒當咧夯,台灣邊境防疫也繼續維持。陳時中:「各類的變異株攏需要特別注意,所以阮拄才講邊境的政策目前袂放冗,嘛愛確實做好居家檢疫14工,這攏是阮目前必須愛嚴格要求的。」

予疫情損盪冬外,歐美國家漸漸解封,歐盟16審查安全旅行國家名單,證實台灣有佇名單內,若會議結論同意,成員國就會沓沓取消對台灣「非必要旅行」限制,不過敢猶需要檢測、隔離等等措施,愛由各成員國決定。

相關新聞