學生長時間繩電腦上課 醫師籲半點鐘就愛小歇睏

新竹一个國中二年仔的學生,原本近視150度,最近發現目睭痠麻,看物件變霧霧,近視雄雄增加到350度。醫師是呼籲,這馬疫情期間,愛特別注意使用電腦的時間,上好30分鐘,身軀就愛起來振動一下。

坐佇電腦頭前上課,時間一久目睭痠痠麻麻,受著疫情影響,最近學生攏需要用電腦上課,螢幕規工看落來,目睭真食力。
 
家長:「逐工起床就是拍開電腦,看線頂的課程閣來寫線頂工課,紲落來歇睏的時陣就是看電視,無就是看手機仔,所以用3C產品的時間加了誠濟。」
 
新竹有一名學生,就是因為用電腦的關係,近視對150度變350度。醫生提醒用電腦30分鐘,上好身軀起來運動10分鐘,尤其是目睭愛瞌瞌歇睏,千萬毋通閣提手機仔出來看,按呢會對目睭傷害閣較大。

中醫大新竹醫院眼科主任陳瑩山:「手搖搖的,會使隨佇房間行行的,共身軀振動一下,做體操,毋過袂使挼目睭。」

另外醫生嘛建議,這段期間儘量莫食糋的物件,以免增加對血管的傷害,對目睭嘛無好,建議逐工五項青菜佮適量的卵白質,對保護目睭有真大的幫助。

全台敬老金大調查

相關新聞