臺鐵敗馬出動300外位消防員 著注重搜救訓練

這改火車敗馬事故，第一時間投入救災的，就有300外位消防員，IN佇事故發生後的三點鐘，就共所有的生還者救出去。毋過消防員佇有限的搜救空間內，佮時間競爭，確實有難度，咱臺灣佇有限空間的搜救訓練和應變，猶是需要投入，閣較濟資源。

4月初2，10點50分，著傷的患者經過重重艱難，總算對車廂頂頭予人扛出來。

車廂頂懸成做搶救的唯一通道。搜救員peh懸peh低，直直回報OHCA人數，也緊閣共物資接入去。

300外个消防員，佇第一時間去到現場，毋過狹櫼櫼的隧道，袂通風、搜救難度懸，搜救人員20分鐘，就愛換班歇睏。

上倚近清水隧道，專屬於隧道救援分隊的和仁分隊， 舊年佇交通部的支持之下，送12位人員去瑞士、荷蘭參加長隧道救災模擬訓練，這改有8個投入救災，IN講用包括用重型機具破壞、KING車廂、操作支撐器材、到搜救員本身心理狀態的調整，攏有應用著，其中以車體破壞救助的技能用上濟，毋過公路和隧道的救援猶是有誠大的精差。

南投竹山的消防訓練中心，雖罔有隧道和鐵路救援的模擬場所，不過消防員坦白講實際作戰的能力，需要閣較完整、真實的訓練基地和課程，才會當佇災害來的時，有閣較周全的準備。