蕭屋洋樓整修 未來通做佳冬客家古蹟群新景點

屏東的佳冬,是在地真大的客家庄,庄內有真濟古蹟,攏已經整修好勢。其中,蕭屋洋樓,已經核定做歷史建築,嘛爭取著2600萬的經費來整修,欲共這个建築,重新利用,拚觀光。

佇屏東佳冬,蕭家古厝邊仔的這棟樓仔厝「蕭屋洋樓」,經過戰火和時間的消磨,已經徛86冬。今透過眾人的走傱,已經核定做歷史建築,而且也爭取著客委會2600萬的經費來整修,欲重新啟用做觀光景點,按算年底會完工。

這棟有3層樓、結合西洋和日本風格的蕭屋洋樓,佇1934年起造,當初時是由佳冬的大戶蕭家的蕭恩鄉所起,伊斯當時做佳冬庄的庄長,21冬的任期內,助日本政府設忠魂碑、佳冬神社、協助日本政府起佳冬飛行場,這棟洋樓就是提來接待日本官員所使用。

佳冬庄是真大的客家庄,倚近火車頭的這个地區,聚集真濟古蹟,包含蕭家古厝、敬字亭、西柵門、楊家宗祠、張家商樓等等。聽候蕭屋洋樓整修好勢,這塊客家的歷史地圖會更加完整。

全台敬老金大調查

相關新聞