立委.環團促政府調整水錢 該照用水量加收錢

這站仔水情絚檔檔，3/12就立委召開記者會，講應該趁這个機會檢討水錢的合理性。嘛有民間團體認為，臺灣的水錢傷過俗，建議會使參考電錢這款，跳坎的費用計算方式，用愈濟錢著愛收愈濟。

水情緊張，部份地區已經開始減壓佮減量供水，台灣民眾黨的立院黨團3月12開記者會，講應該趁這个機會，重新審視水資源分配佮水費的關係。民眾黨團指出，每個月用水量超過50度的戶數干焦佔總體用水戶數的百分之五，但是用水量煞占整體的百分之四十一。

環保團體嘛表示，2016年政府捌提出的耗水費，應該愛來實施佇用水量較懸的用水戶，一般用量的民生用水戶嘛著依照用水量來調整水價，上無水價著愛反應水的開發成本才會使

針對耗水費的部份，水利署表示，目前猶閣佇咧了解收耗水費對產業省水的效果，已經有佮產業界溝通收集資料，推出的時間猶未決定

水價的費率著愛台灣自來水公司提出計畫，送到經濟部的水價審議委員會審議了後，才會調整。台灣自來水公司講，最近攏咧無閒調水，目前猶無調整水價的計畫。