"逐日一幅天文圖" 蔡安理用臺語紹介宇宙奧妙

為著予人閣較了解天文智識，NASA美國航太總署對1995年創一个網站，叫"逐工一幅天文圖"，逐工攏會刊一張天文相片和紹介的文字予人參考，舊年底中央大學天文所博士後研究員──蔡安理，家己寫批予NASA，講家己願意用台文翻譯這寡的天文圖紹介詞，閣共錄做podcast，就是希望母語會當結合天文，紹介天星宇宙的奧妙。

今年2月中，美國航太總署成功共這粒號做”毅力號”的火星探測器送去到火星，閣翕著珍貴的影像，這相片毋但刊佇NASA逐日一幅天文圖的網站，這馬台灣嘛得著NASA批准，有全台文翻譯。

華語講的螺旋星系，捲螺仔星系，螺旋手臂，捲螺仔手骨，老鷹星雲，鴟鴞星雲，猶閣有藍掉隊星，藍色浪星等等。蔡安理研究員，愛天文，嘛愛母語，對2020年年底開始翻天文圖到今，已經翻超過60篇，逐日就咧想按怎共天文專有名詞，翻甲袂有精差，閣倚近伊的原文。

蔡安理嘛邀請朋友，用台語紹介天文圖，共錄佇podcast內底。NASA逐日一幅天文圖的網站，已經予人翻做20外種語言，這馬台語嘛在內，蔡安理講未來會繼續抾遮的詞彙，望母語和天星結合，永遠留存。