南華大學學生會指控 校方新規定影響修課

南華大學前進因為境外學生作穡超過時間,做散工的事件,予教育部列做「教學品質查核」的對象,所以後來針對學生的上課、修課的安排,有訂出一寡仔新的辦法,學生會這馬認為新的規定,會影響著學生的權益,今仔日和高等教育產業工會開記者會,要求學校做修改。

大聲講出訴求,要求學校修改政策,嘉義縣南華大學的學生會,參台灣高等教育產業工會召開記者會,講南華大學為欲配合教育部的「教學品質查核作業」,訂出全面性密集巡堂、強制性到課、學生修課堂數母的袂當超過11節,種種新規定,煞影響著學生排課和修課時間的規劃。

毋過學校表示,這擺的規定是專案配合教育部的查核,所有的過程攏合法,昨昏嘛有向校內老師來說明。

記者會現場,佇邊仔嘛有教授提出無仝的看法。只是伊選擇用唱歌的方式,希望學生會佮學校會當好好仔參詳。

南華大學學生會表示,學校對教育部的查核動作,做了傷濟無必要的規定,希望學校會當修改。毋過學校嘛表示,離教育部欲來查核賰無偌濟時間,所以會繼續共學校的學生佮老師說明,希望會當予逐家攏清楚目前的目標。

全台敬老金大調查

相關新聞