現場照服員帶領遮的阿公阿媽做伙活動，來到這間日照中心的老大人，攏是失智、失能的長輩，逐工來遮上課、佮人互動。
佇旗津65歲以上的老大人至少五千人，遮是旗津第一間日照中心，450坪的空間，開闊閣四序，其實進前遮是地方里民的活動中心，1樓目前是市場。
原底是無人使用、只有生蠓仔的"蠓仔館"，成功改造了後，這馬逐工有老大人來上課，嘛加減帶動市場的生理，親像按呢無咧使用的公共空間，佇高雄閣袂少，鼓山的中山國小，學校已經佇5年前搬厝，舊的校舍將近5公頃，除了這陣有鼓山分局暫蹛，其他攏無人使用，問題嘛蓋濟。
市府已經向中央爭取八千萬的經費，因為進前已經有大同國小佮鼓岩國小，共無人使用的校舍改做日照中心的案例，毋但公共空間通好再利用，嘛予在地老大人會當得著閣較好的照顧。
