新竹南寮漁港水路予塗石窒變狹 啟動改善

新竹的南寮漁港一年有超過2萬逝的漁船仔出入，毋過時間一久，沙會沉底、港口會積沙仔。漁民若欲出海，著愛配合海水的大流。為著欲解決這个問題，對今仔日開始欲進行清沙工程，改善漁民的作業環境。

規排的漁船仔停佇港口內底，無法度出海掠魚，新竹南寮漁港漁船進出水道，因為地形佮天候因素，長年堆積大量砂土，予遮的漁民收入定定受著影響。

過去新竹漁港差不多2年著愛疏濬一擺，漁船仔才通順利出海掠魚，今年的疏濬方式，特別採用暗管抽取，希望工程會使提早完成。

這擺的工程總經費是對漁業署補助2500萬，按算今年11月完工了後，漁民出入航道會閣較安全，,嘛較免受著洘流的制限。