顧全防疫 嘉義大廟調整新正傳統.管制出入

新年新寄望，真濟人會用歇過年的時間，去拜拜求平安。毋過為著防疫，改變真濟生活方式，親像嘉義縣的宮廟，嘛開始咧安排民眾來參拜的防疫措施。
因為疫情的關係，上宮廟拜拜的民眾，不管大人囡仔，逐家攏有掛喙罨。為欲防止疫情四界湠，嘉義縣的一寡大宮廟，嘛攏調整過年的活動，減少民眾絞群。

配合政府防疫的政策，這馬欲入去廟內底，除了掛喙罨，嘛愛量體溫佮消毒，廟方也共出入口分開，請工作人員抑是用設備來管理出入。
縣政府表示，過年期間來宮廟拜拜的民眾是南來北往，防疫的工課非常重要。廟方嘛強調，除了相關的防疫措施，針對入廟的人數嘛會做管制，呼籲信眾出入愛配合防疫，避免疫情散佈。