欲32萬人至少有4間厝 政府壓囤房成效受質疑

有幾間厝才算是好額人？財政部最近公布舊年房屋稅籍全國歸戶統計，若用個人來算，有厝的人大約是804萬人，這其中4％的人，手頭有3間厝以上，大約是32萬人。就有人質疑囤厝的情形愈來愈嚴重矣。

講著買厝，這馬真濟人攏講家己買袂起，毋過財政部最近公布去年房屋稅「個人歸戶」的統計表，全台灣有厝的人計共有804萬人，其中個人有四間厝以上的，有將近3２萬人，若比較舊年31萬５千人來看，大約是加欲1.1％ ，有人質疑囤房量無減顛倒增加。


不動產專家表示，照IN觀察若個人有幾若間厝，除了短時間繼承，嘛有可能是佇貸款利率較低的時加買的、或者是進前預售的販厝雄雄交厝，袂當講按呢就是囤房，另外財政部這擺也特別公布舊年「家戶歸戶」的統計表，巢運團體認為用家戶來算，較通好反映現況。

家戶歸戶統計，是按一戶內，翁仔某佮猶未成年的子女來計算，巢運團體認為，財政部若會當共過去幾冬的家戶歸戶圖表攏統計出來，可能較會使予逐家了解這站台灣敢有囤厝的情形。財政部是表示，未來個人佮家戶兩種的統計表攏會公開。