嘉義塭仔社區起大鼎灶 做伙煮食聯絡感情

嘉義東石的塭仔社區，是傳統魚村，公共設施較無齊全，甚至有真濟土地拋荒。社區發展協會最近邀請、規劃師來起一口大灶，希望予社區的囡仔佮序大人做伙煮食、聯絡感情。

社區志工替大鼎灶燃柴，邊仔閣有準備魚仔欲來烘。原本這片土地只有種一寡物件，地主共土地捐出來予社區來規劃使用，逐家做伙討論了後，決定欲搭棚仔起一口大鼎灶。

東石鄉的塭仔社區有九百外人，因為所在偏僻，一寡建設較無充足。社區發展協會佮居民，決定打造一間社區廚房，予社區內底有一个會當做伙煮食、維持感情的多功能活動空間。

社區發展協會指出，為著生活逐家攏出外食頭路，庄跤內底攏是囡仔佮序大，這跤大鼎灶先來替序大重現早時的生活記持，紲落來閣欲替囡仔起一个會當tshit迌的所在，予這个社區的生活環境愈來愈好。