真理臺文資料館換鎖.拒絕張良澤進入 學界批評

真理大學臺灣文學資料館的換鎖頭風波。當事人張良澤教授,今仔日佇臺南開記者會說明。張良澤宣佈,以後伊就毋是臺灣文學資料館的榮譽館長,除了伊私人的物件,資料館內面的文史資料就交予學校處理,目前教育部有表示講、欲出面協調這層代誌。


嘴笑目笑咧掀日本時代台灣少 年工的資料,這是2015年張良澤教授,佇真理大學麻豆台文館內底的畫面,彼當時,教授座位邊仔攏是冊佮資料,毋過無偌久進前,學校煞連大門攏無愛予伊入去。

張教授的前某,詩人王麗華就替伊抱不平,講張良澤心內一定足艱苦,因為伊過去是彼種,為著研究,連生活費攏提去買冊的人。

張教授對台灣文學的癡情,自伊較早佇成功大學教冊就因為提倡鄉土文學,予執政的國民黨政府迫害,前往日本,一直到黑名單解除才轉來台灣,後來佇真理大學創辦台灣第一个臺灣文學系、做第一屆系主任,成立台灣文學資料館。後來資料館徙去台南麻豆,伊就一直共遮當做厝,退休後也仝款,只是現在煞連入去攏有困難。

作家陳芳明等文學界人士,攏仝齊贊聲,也有真濟人佇真理大學的面冊喝聲,愛校長出來會失禮,希望長年佇台文館付出的張教授,得著合理的對待。

相關新聞

專題|全台敬老金大調查