暗頭仔的公園，氣氛變甲真無仝，遊客佮在地人，來到遮欣賞最近才徙來遮的12項藝術品，佇下跤翕相留紀念。
12座藝術品，透過社區、學校佮藝術家的創作，結合環保的概念，有藝術家表示，今年發生太濟代誌，希望透過作品會用予逐家心情較好。
明年是新港鐵路公園20週年，嘉義縣文化基金會佮新港文教基金會合作，以生活的脈動做主題，邀請13位藝術家創作，12/19暗時點燈，欲佇公園內底展出2個月。
新港文化基金會表示，過年的時陣，真濟香客會來到新港的廟寺，祈求未來一年順序平安。基金會希望透過藝術的方式，予來到遮的人感受在地創作的文化美感。
