海巡署第一隻國造安平艦交船 總統親身主持

海巡署頭一隻沱江級的巡防艦,12/11佇高雄的中信造船廠交船。因為這隻船有鬥飛彈系統,平常時仔,除了會當巡防,嘛會當相戰,受著各界關注。總統蔡英文嘛專工落南去參加典禮,也強調國艦國造、維護國家安全的決心。

海巡署第一隻沱江級安平艦正式交船,總統蔡英文佇交船典禮會場上,特別表明維護國家海域的決心

照海軍沱江級原型艦設計的六百噸安平艦,仝款是雙船體,有高壓水砲、最大射程是120米、主要執行海上逃生救難,越界陸船驅離等任務,嘛有鎮海火箭彈武器系統等等,而且會當作戰,不只航行速度緊會使達到時速80公里,閣留有雄二、雄三飛彈系統使用,未來會加入南部海域巡防,嘛排定明年佇國軍漢光演習實兵操演

中信造船公司今仔日先交第一隻安平艦,第二隻成功艦嘛同時號名落水,按到2026年計共會有12隻海巡艦交船。蔡總統隨後嘛上船巡視安平艦,向逐家擛手,宣示國艦國造繼續行。

全台敬老金大調查

相關新聞