雙十慶典鬧猜猜 陳錫煌.廖瓊枝到場祝賀


今年雙十受疫情影響,僑委會表示干焦千外人回國觀禮。抑這回,頭擺開放5百名民眾參加大會,入場攏著掛喙罨、磅體溫,防疫事工猶原毋放冗。抑國寶藝師陳錫煌、廖瓊枝和臺語金曲歌后江蕙儀攏有去到現場表演,公視台語台和觀眾朋友同齊感受氣氛。

CH-47運輸直升機相紲第二年掛大幅的中華民國國旗,和UH-60M黑鷹直升機,同齊飛過總統府,2020國慶大會正式開始。

20位台灣防疫代表和台北醫學大學合唱團,帶領眾人唱國歌。

今年國慶大會的主題是「民主台灣,自信前行」,公視台語台嘛佇現場,用全台語轉播。

看著予人心驚膽寒,反劫公車演練,閣出動直升機佇凱達格蘭大道,低空飛行,也是有史以來頭擺。

國寶級藝師陳錫煌弄布袋戲,串連現場各種表演。

猶有台語金曲歌后江惠儀和歌仔戲藝師廖瓊枝合唱,精彩的演出。

今年搪著疫情,僑委會表示轉來台灣的僑胞只有1100外人,比舊年減5000外人。慶籌會是頭擺抽抽鬮予500位民眾入場觀禮,不過攏愛配合安檢、磅體溫、掛喙罨,也愛閬位坐。

大會的大葩尾,雷虎小組噴七彩煙火,飛過總統府。今年的國慶煙火下昏暗佇台南安平漁光

島也會加發2萬7千外發,欲唌閣較濟人同濟祝中華民國雙十節快樂。
 

全台敬老金大調查

相關新聞