有臺灣第一才子之稱的呂赫若，是日本時代誠出名的臺灣作家。呂赫若先生的後生，佇8/25、也就是呂赫若的生日，共呂赫若過身了後，唯一的手稿日記捐予臺灣文學館保存。
台灣作家呂赫若的日記，對家屬手頭交予臺灣文學館館長，已經保管70冬的手稿日記，家屬願意捐出來，文學館真感謝，現場包括文化部長，濟濟的貴賓，家屬的願望足簡單，希望日記囥佇臺灣文學館會得著較好的保存。
捐冊活動現場，呂赫若的五位後生佮查某囡攏來參加，拄好8月25號這工是in爸爸的生日忌，這本日記是伊唯一留下來，猶未出版的作品，因為其他的已經全部埋入土中。
呂赫若是台灣日本時代重要的作家，伊留下誠濟文學、音樂創作，毋過伊為著理想，加入地下組織，最後佇鹿窟基地受難，彼當陣伊才36歲。這本用日文寫的日記，是伊對昭和十七年，也就是1942年開始記錄，佇東京的生活，嘛有伊個人的心情佮文學思想變化。
其實家屬進前也捌捐出呂赫若的結婚相片等等文物，佇文學館修護保存，嘛已經提供日記影印原稿，予臺灣文學館出版，這改家屬進一步共日記捐予文學館，予民眾有機會親目看著文學家的手筆。