民意若流水 高雄藍綠版圖2冬內變動緊


若共高雄市長補選算入來,這已經是高雄今年第三擺的投票。本底民進黨執政已經20年的高雄,佇2冬前煞翻盤。就有地方的民意代表認為,高雄人對政治人物的表現、反映真直接。嘛有學者認為,這擺補選候選人的實力,差誠濟。

6月6號高雄人頭一擺投票罷免市長,做市長冬外的韓國瑜,予市民罷免,紲落來嘛是頭一擺的市長補選,高雄人對政治人物的選擇轉變速度真緊。

高雄佇縣市合併前後,民進黨執政20年,綠營支持者比藍營濟,毋過兩年前發生誠大變化,2014年市長選舉,彼當陣陳菊提著99萬票68%支持,藍營只有31%,到2018年,國民黨韓國瑜提著89萬票54%的支持,民進黨倒退至45%,紲來2020年總統大選,藍營佇高雄賰34%支持度,民進黨變成62%支持。

藍營民代攏毋敢講,這馬國民黨佇高雄到底閣賰偌濟基本票。對民進黨來講,是希望延續罷免後的氣勢,佇市長補選,衝懸票數。

學者認為,毋管提偌濟票,國民黨愛思考,怎樣佇高雄重新徛起來。對頭一擺參選高雄市長的民眾黨來講,這擺補選是練兵,會使和高雄市民互相了解,各政黨重點攏是兩冬後的市長選舉。
 

相關新聞

專題|全台敬老金大調查