南投有社區設置魚菜共生系統 望永續經營

南投草屯的御史社區,遮建設一片「魚菜共生」的系統,來飼鱸魚、種柑仔蜜。原理就是用魚仔的排泄物,變做柑仔蜜的肥底,果子栽仔嘛通改善水質,予鱸魚敖大隻。所有種作的收成,閣攏欲予社區關懷中心遮的長輩序大加菜,食著健康閣天然的魚仔、菜蔬佮果子,這款永遠循環的農業,毋免用化學肥、對土地無敗害,是上蓋有意義。

社區阿媽咧討論按怎照顧這寡柑仔蜜,予in緊熟聽好提來食。這是南投草屯的御史社區所搭的魚菜共生系統,毋但飼鱸魚閣通種柑仔蜜。

社區申請的這座魚菜共生系統,平常時攏是由社區的照顧服務人員咧管理,除了請老師指導愛按怎種作,社區的阿媽三不五時嘛會鬥巡頭看尾。因為種出來的菜,會使佇社區據點中晝共餐的時加菜,予序大食著天然閣健康的食材。

因為政府補助的資源有限,社區愛家己想辦法揣資源,才通永續經營。御史社區毋但有家己的菜園,這馬閣有魚菜共生的系統,予社區的資源擴大,嘛造福在地的序大人。

記者 綜合報導

 

相關新聞

專題|全台敬老金大調查