書展大獎公佈 歌仔戲國寶楊麗花的傳記著獎

臺灣國寶楊麗花，創造臺灣食飯配電視歌仔戲的時代，也予臺灣文化衝甲世界通人知。今年國家影視聽中心規畫、由歌仔戲劇作家施如芳以傳記的方式，結合上新的研究，出版「如有神在」，紀錄楊麗花的歌仔戲人生和電影生涯。這本冊咧今年的台北國際書展大獎，得著非小說類獎的肯定。

台北國際書展大獎得主 施如芳
歌仔戲的節目佇主流媒體占著一个光爍爍的地位所以佇後來咱咧找揣臺灣這片土地的主體性的時陣歌仔戲才會當揚眉吐氣變成這馬予逐家同意是真有代表性的一个臺灣文化的代表

台北國際書展大獎三个獎項，總共9个著獎者。其中「七月爍爁」提著小說類獎，小說對七舅公對日本轉臺灣講起，呈現殖民議題，嘛徛佇時代變化的角度，來講死亡、語言、文明等等。面對外界關注的自創台文用字，作者表示伊嘛驚人會看無，所以書寫策略是以台語濫華語希望讀者看字去臆意思，感受台語的典雅。

台北國際書展大獎得主 林俊頴
以我的故鄉為藍圖寫出來的小說另外一部份就是寫這馬現在發生的代誌所以兩爿來對照來看覓仔講這段時間遮爾久過去矣是啥物物件對我非常重視 我感覺若珍寶的這馬哪自按呢攏無去矣

18的頒獎，猶有國內出版界唯一針對出版設計來獎勵的「金蝶獎」，頒發金銀銅三个獎，今年總共有13本出版品入圍，包括一本台文詩「你佇風中行來」，入圍的作品也全部送到德國，代表臺灣參加「世界上媠的冊」設計比賽。

記者 呂尚儒 莊浚佑 臺北報導