楊逵120週年冥誕 臺文館推出「新編楊逵全集」

「送報伕」、「壓不扁的玫瑰」攏是臺灣作家楊逵真出名的小說，伊佇日本時代1906年出世，伊的文學關注社會的底層百姓，嘛予人看做是「智識份子的社會良心」。今由臺文館策劃「新編楊逵全集」，攏總18本，其中一本「戲劇集」，收錄15篇楊逵對日本時代、到戒嚴時期的戲劇作品，咧楊逵明年的120週年冥誕進前，舉辦新冊發表會。

「新編楊逵全集」戲劇集主編 楊翠:「伊的街頭劇理念有一部份是和新劇的彼个部份，當代性現代性是有關係的，派文學的理念就是講伊的文學愛寫咱勞苦的大眾，愛關懷勞苦的大眾」

楊逵的查某孫楊翠，也是「戲劇集」的主編，伊指出楊逵的戲大多數攏有演出過，為著欲倚貼一般百姓，真濟攏是用台語寫劇本，也採錄運用真濟歌謠、諺語等等。事實上，第一部「楊逵全集」佇1998年就出版矣，毋過20幾年來，累積真濟新的文獻、和研究，臺文館徛佇經典文學的推廣、現代化佮公共化的角度，出版「新編楊逵全集」。
「新編楊逵全集」總主編 黃惠禎:「楊逵的家屬有發現一批遺稿手稿，是以早阮無編入去楊逵全集內底的，我這馬算算大約是20幾篇，但是這幾篇內底有重複的，阮閣愛做整理」

臺灣文學館長 陳瑩芳:「現代讀冊的方法攏改變矣，所以不止是紙按呢的出版爾，我足想講以後嘛欲做數位化」

今戲劇集頭先出版，臺文館期待這寡文本，未來會當成做文創和戲劇創作的塗肉，抑若全集完整出版愛等到2026年十月，臺文館希望這套冊，會當予閣較濟人認捌楊逵，嘛通為臺灣文學研究和歷史增加深度和闊度。