台語台"菜鳥仔NICE PLAY" 訓練台語啦啦隊

啦啦隊的青春舞蹈，定咧比賽過程替選手加油、嘛帶動全場氣氛，這幾年臺灣的啦啦隊文化因為國際比賽受著關注。公視台語台欲推出全國第一个啦啦隊養成實境節目「菜鳥仔NICE PLAY」經過海選攏總招10个成員參與，其中有成員往過是運動選手，這馬雖然無做選手矣，毋過伊向望透過角色轉換改為選手加油。

節目成員陳建宇:「我閣袂當放棄，因為閣有人咧看，我閣愛閣較加油，這就是為啥物我想欲來參加這个啦啦隊的原因」
節目成員連尹華:「阮就是普通的人 ，毋是啦啦隊，但是足多謝節目會當予阮真正做一回啦啦隊」

為著欲予觀眾對養成的過程，了解啦啦隊這个工課的鹹酸苦澀，「菜鳥仔NICE PLAY」嘛招職棒的五位應援團長，做伙來參與節目，訓練遮的菜鳥仔，希望予ﰀ了解毋是干焦唱歌跳舞爾爾，閣愛有棒球智識，訓練體力、閣有培養團隊合作的能力等等。

職棒應援團長阿誠:「捌棒球、你嘛愛對棒球這个運動有熱情，所以一般來講阮是大概差不多訓練半冬的時間啦，所以足厲害的，in會當佇咧兩三個月內底，就會當有按呢的表現。」
總導演潘俊佳(嘎嘎):「毋是干焦咧跳舞爾爾，毋是干焦咧應援爾爾，我感覺學會曉團隊人情世事足重要的，這佇節目內底攏看會著。」

節目會佇今年底起鼓，佇咧實境養成的過程，會對10个選手內底淘汰4位、最後干焦選出6位，會當徛起去棒球場的ôo-ián舞台，用台語替選手加油、希望替臺灣應援文化注入新能量。
記者 呂尚儒 林郁凱 臺北報導(新聞標題、導言及內文皆為台語文)