屏東東隆宮國寶級木匠造王船 頭擺開放參觀

噯仔聲伴著鼓聲，轎班的人員手提著零件捒船，一步一腳印，重現東港迎王祭典特有「陸上行舟」的鬧熱，in護送的這隻船，就是東港東隆宮精心打造，象徵溫府千歲神威的典藏王船，22透早對東隆宮一路捒到王船文化館，做頭擺的展出，因為機會難得，吸引袂少民眾翕相錄影。

這隻典藏王船是使用hi-nóo-khih做的，長度超過6公尺，當初是由5位國寶級的木匠師，開8個月的時間，佇2016年完成，這九冬來一直攏囥佇東隆宮保存，為著予新的王船文化館閣較有看頭，廟方決定共船徙出來提供民眾參觀，予逐家更加了解東港迎王的特色。

除了王船，文化館內底嘛有新的特展通看，7種無仝款的色水，代表迎王的7个轎班，每一个轎班攏有家己的發展佮故事。縣政府文化處表示，欲予王船文化館的內容，愈來愈豐富。