左鎮教會設教155週年 招在地用藝術妝娗社區

七彩的繩仔佮彩蛋掛佇左鎮老街頂做妝娗，邊仔的蔗埕公園嘛有古錐兔仔的裝置藝術，予人感受著春天的氣氛。為著慶祝設教155週年佮閣活節，臺南左鎮教會毋干焦辦活動，閣佈置社區環境。活動中，教會嘛透過台羅拼音，教囡仔唸出當地15个特殊的姓氏，像是「買」、「力」、「毒」、「兵」等，予囡仔認捌家己的根。

臺灣基督長老教會左鎮教會牧師鄭逸新講：「阮遮較大的姓一个是買，日本時代抑是民國時代欲登記戶口，in就愛取一个名。所以就取最後一个音，買。有人的姓是in進前這个家族攏無，為著欲改變家己家族的運勢，去登記較旺族的姓，有的人就共in兜姓改做力。」

往過左鎮人口捌有上萬人，這馬減甲賰4100人，成做全市第二少的行政區。有退休的公共藝術家林昭慶，看著遮有真好的自然佮產業資源，進駐左鎮，開設竹藝班，閣參在地竹藝師李天生合作，向望予竹仔發展變做經濟作物，in嘛按算共竹仔應用佇竹構、竹厝等方面，共發展做綠色產業。

藝術家林昭慶講：「阮入來到這馬至少有六个少年人，已經轉來到咱的老街做發展，像咱的左慢點的一寡活動，這攏是真濟少年人慢慢仔入來投入。」

臺南市左鎮區長余基吉講：「過去阮推動地方創生了後，逐家小可重視左鎮這个所在，袂少在地青年佮外地的藝術家，嘛攏真關心這个所在矣。」

藝術家講，全臺灣上短的老街就是左鎮老街，總長干焦58公尺。對稀微，到這陣靠社區逐家做伙拍拚，加上藝術家定期辦活動，活化這塊土地。In上大的向望，予左鎮毋但有過去的歷史，閣較有未來的可能性，繼續予在地有無仝的光彩。