無閣用「閩南語」 教育部台語認證3/8─3/9考試
發布時間：
更新時間：
對112年開始，教育部台語認證考試，逐年的3月和8月攏會舉辦，一年攏有3萬外人報名。114年3月這梯，就辦佇這个拜六、禮拜（3/8─3/9）。也因為國家語言發展方案，今年是頭一年共「閩南語」改用「臺灣台語」來辦理。（新聞標題、導言及內文皆為台語文）
大部份的人會曉聽台語、講台語，毋過對台語讀寫較生份，教育部逐年有舉辦兩擺的台語認證考試，大約攏有三萬人參加，這个拜六禮拜就是114年度臺灣台語認證考試，今年是頭一冬正名用「臺灣台語」辦理認證考試，有分做基礎、中級、專業，ABC三種考試，三月份這梯計共1萬7千外人報名，A卷報名人數也有增加。
教育部終身教育司科長 黃鈺維：「114年3月報考人數，總共有1萬7347人，其中A卷的考生，比舊年3月增加254人。」
這幾年因為各界對本土語言課愈來愈重視，根據大考中心的資料顯示，112年到114年三月份梯次A卷的報名人數對7281人增加到9228人學者也表示，台語認證佇台語復振這條路，毋但會當佇培養台語人才的過程，有一个客觀的標準，也通予少年人佇準備考試的過程中，沓沓培養母語意識。
臺師大臺文系教授 許慧如：「雖然這个環境一直咧流失，所以透過考試予少年人抑是囡仔，伊較有這種意識，按呢伊會當有閣較好的語言能力、語言韌性、對臺灣的理解。其實會曉講台語、有台語能力，咧臺灣實際上是用會著的。」
學者也講，因為過去的國語政策，致使台語予人打壓，造成社會獨尊華語，甚至看袂起母語、毋重視母語。有正式的檢定也通予閣較濟人了解伊是正常的語言，拍破錯誤的印象。另外，目前基礎的A卷對112年開始是採用電腦化測驗，教育部表示，確認電腦化考試的流程和規畫閣較完整，未來拍算中級的B卷也會行向電腦化考試，到時陣也會提早公佈予民眾知影。
記者 張佳倪 謝季潾 臺北報導
唐嘉良/編輯
