101跨年清25噸糞埽 1/2早起6點車路恢復通行

台北101的跨年活動結束，元旦這工，拆除101跨年舞台的業者規工攏咧無閒拆除的作業，邊仔也圍封鎖線，愛經過的民眾毋通倚近，才袂危險。有外國遊客表示：「阮對馬來西亞來遮，就是欲來遮翕相的，然後施工就無法度佇遮翕好看的相片。」、「原本是想欲佇遮翕101了後，佇彩虹步道頓卡，今仔日就感覺毋是真方便。」

台北市政府公告，目前市府路佮新仁愛路舞台猶未拆煞，所以元旦猶是禁止通行，預估愛等到1/2拜四透早6點過後，才會當恢復通行。

抑若這改的台北101跨年煙火，吸引超過20萬人去看。活動一咧結束，收煞的工課隨開始，台北市環保局表示，跨年活動結束就隨派785个清潔人員、44台清潔車，去做清理作業，攏總清出來25頓的糞埽。環保局嘛特別呵咾，民眾愈來愈有環保意識，照起工分類，免一點鐘的時間，清潔人員就共活動現場的糞埽整理好勢。台北市環境清潔管理科專員—陳浩彰表示：「佮往年比起來，糞埽較無咧烏白擲咧塗跤，因為阮隊員結束的時陣，攏會共糞埽袋仔拍開。」

另外，台北市環保局嘛表示，跨年暝也有掠著9件烏白擲薰頭的違規，其中有8件佇夜店門口，1件佇大巨蛋。環保局提醒民眾，若是亂擲薰頭，會當罰3600至6000的罰金，提醒民眾毋通違規。