《閻羅石磨心》新齣頭 歌仔戲、布袋戲相敆做伙搬
發布時間：
更新時間：
有劇團共布袋戲佮歌仔戲，兩種臺灣傳統戲曲結合做伙演出。怹將舞台重新設計，適應劇種的特色，予這兩種傳統戲會當同齊佇台頂呈現。希望予傳統戲曲有新的模樣，吸引無仝族群，做伙踏入劇場看戲。（新聞標題、導言及內文皆為臺語文）
予范謝將軍押走，欲接受閻羅王的審判，演員佇台頂演出，也有布袋戲尪仔做伙搬戲。這齣戲《閻羅石磨心》，共歌仔戲佮布袋戲，兩種台灣傳統戲曲結合做伙、仝台演出。
《閻羅石磨心》製作人／偶戲領演 陳建霖：「伊凡勢是歌仔戲的族群，但是伊無了解布袋戲；這馬可能有一寡是布袋戲的族群，伊無啥了解歌仔戲。這部份佇咧阮遮，這擺的製作，會當攏有看著，有歌仔調為主體的布袋戲來做呈現，這是阮的特色。既然有這種的歌仔調布袋戲，是按怎無愛共歌仔戲佮布袋戲做陣來做？」
欲共這兩種戲種結合做伙，真人、布袋戲尪仔大細身差真濟，是上僫克服的問題。劇團結合傳統布袋戲舞台──彩樓，共舞台對低到懸隔做三層，予尪仔、演員咧同時演出的時，閣較有層次。
《閻羅石磨心》導演 簡育琳：「咱就共伊用做三个層次：可能第一層我就一个人演的戲，可能佔舞台的二分之一，後壁彼个就是咱會分做兩个階段；第二層就是予尪仔、尪仔藝師，咱的尪仔藝師佇遐弄；第三層我就共布袋戲上蓋主要的彩樓，咱共伊囥咧舞台的中央，予逐家看起去有層次。」
這齣戲是一个29歲的少年布袋戲藝師──陳建霖發想，由成立歌仔戲劇團欲20年的資深歌仔戲演員──簡育琳做導演。怹攏希望透過結合無仝劇種，予傳統戲曲有新的面貌，吸引閣較濟無接觸過傳統戲曲的觀眾來看戲，予台灣傳統戲曲通永久流傳。
記者 郭柏均 謝季潾 新北報導
唐嘉良/編輯
