請水牛做老師 嘉義大林在地團體辦食農教育

農業環境的改變，這馬和過去種作的方式、已經無仝款，為著欲予學生對犁田有實際的體驗，嘉義大林的地方創生團隊，舉辦食農教育、請水牛來做老師，希望予學生會當佇課本以外，了解著水牛佮種作之間的關係

高一鑫老師向國小的學生囡仔介紹牛犁，解說較早牛是按怎用牛犁來犁田，嘉義縣大林的三和國小，舉辦食農教育的課程，請一隻水牛來到學校，予囡仔實際來接觸，早期農業社會的耕牛。

上課講師高一鑫：「牛就是咧幫咱水稻的田來整地，所以予學生了解講，米 食米的彼个過程是按怎來，種作的過程是按怎來的。」
大林鎮三和國小學生蔡同學表示，感覺誠歡喜、然後今仔日看著水牛，是in頭擺看著。
佇較早的農業生產內底，牛誠重要，為了欲予學生囡仔知影農業環境的演變，嘉義縣農會配合大林鎮的地方創生團隊，邀請保存耕牛文化的青農，牽牛來替學生囡仔上食農教育的課程。

嘉義縣農會總幹事黃貞瑜講，「食農的教育參咱的學校來合作，除了予囡仔學著以外，其實咱嘛希望，共按呢友善農業的食材，會當帶入去咱的營養午餐內底。」

大林鎮三和國小校長尤建順：「閣較了解講，咱以前的農業社會，咱的勞動的這个動物這个水牛，予咱的囡仔會當，閣較近距離來佮這个水牛熟似。」

嘉義縣農會表示，較早庄跤四界攏看會著的水牛，這馬是愈來愈罕見，這个課程，除了予囡仔補充課本以外的農業智識，嘛希望予IN佇食農教育當中，了解臺灣農業生產佮文化的過程。