海科館「造船工作坊」 tshuā民眾了解傳統罾仔船
發布時間：
更新時間：
早期佇基隆八斗子的港口，攏是滿滿的罾仔（tsan-á）船，「罾仔」就是網仔的意思。漁民佇近海掠魚，會3隻罾仔船做一組、同齊出海。毋過後來受現代科技進步，這馬的船隻攏是用玻璃纖維做材質，柴頭做的罾仔船已經漸漸消失佇港口邊，造船的傳統工藝也漸漸失傳。國立海洋科學博物館，特別辦理造船工作坊，向望會當予民眾了解這項傳統的造船工藝。（新聞標題、導言及內文皆為臺語文）
早期佇基隆八斗子的港口，攏是滿滿的罾仔（tsan-á）船，「罾仔」就是網仔的意思。漁民佇近海掠魚，會3隻罾仔船做一組、同齊出海。毋過後來受現代科技進步，這馬的船隻攏是用玻璃纖維做材質，柴頭做的罾仔船已經漸漸消失佇港口邊，造船的傳統工藝也漸漸失傳。國立海洋科學博物館，特別辦理造船工作坊，向望會當予民眾了解這項傳統的造船工藝。
濟濟囡仔佮家長圍佇這隻罾仔船邊仔，替船身抹紅點彩，這是國立海洋科學博物館辦理的造船工作坊，所有的人仝心做伙完成這隻罾仔船，體驗傳統的造船工法。
家長表示，「這隻是柴做的船，所以我特別tshuā囡仔鬥陣來做這隻船，第一改阮有參加，第二改我感覺若有法度規隻船攏做好的時陣，我感覺對囡仔來講足有意義 嘛足好耍。」
另外家長也分享，這馬真少囡仔知影船是按怎做出來的，而且這種傳統的工法閣較罕得看著。海科館也表示，罾仔船上早佇清朝尾期，八斗子、東北角這搭的近海漁業，攏會用這種柴頭做的罾仔船掠魚，毋過這馬的船攏是用玻璃纖維做的，港邊已經真少看著罾仔船。
國立海洋科技博物館研究典藏組主任施彤煒，「這馬佇萬里聽講閣有一台兩台船仔，伊有囥佇海邊仔，毋是欲來掠魚仔，是保存起來的，毋是作業的船仔，所以這馬這種造船的工藝已經攏失傳矣。」
海科館也表示，科學發展、技術進步，這馬真少人使用罾仔船，毋過，罾仔船這款傳統的造船工藝，是祖先為著趁食一路行來的累積，內底有早期漁民的智慧佮對生活拍拚的精神，這也是現代的漁業會當發展到今，真重要的一部分。所以海科館佮海委會合作，佇八月份就有先教民眾用柴頭做罾仔船，趁這个禮拜辦理彩繪工作坊，未來也希望透過閣較濟罾仔船的，體驗活動，予閣較濟人來認捌八斗子罾仔船，學習漁民拍拚的精神。
記者 張佳倪 謝季潾 基隆報導
吳思薇/編輯
