「九月颱，無人知」 山陀兒徙動速度慢、路線歹按算
發布時間：
更新時間：
風颱山陀兒對高雄登陸了後，南部地區風雨也變大，毋過這粒風颱的速度，袂輸是龜咧趖，行向真歹預測，真正是「九月颱，無人知」。（新聞標題、導言及內文皆為臺語文）
（畫面翻翕FB：路上觀察學院）高雄的街仔路雨毋但誠大，強風透甲樹枝直直落落來，路邊的桌仔也予吹甲反去，這是下晡時仔風颱拄對高雄登陸現場的狀況。
南部地區已經連紲放三工的風颱假，這改風颱山陀兒是行了有夠慢，佇咧南部的海域踅幾若工，到拜四中晝的時陣才來登陸。會使看著南部地區高雄、屏東陸續出現嚴重的災情，面對這改風颱行的路草真多變、真歹按算，也予人想著一句俗諺：「九月颱，無人知。」
整合防災顧問公司總監 賈新興：「過去咱應該有一句俗語──「九月颱，無人知」，中秋過去了後，太平洋高氣壓慢慢仔減弱，這个時間，北爿有一寡冷空氣可能會發展出來；這馬閣愛注意，太平洋高氣壓強度按怎變化；另外閣愛注意北爿系統的影響，所以風颱這个路草的變化會較大。」
風颱未來會按怎行、按怎變化，講法嘛幾若款，日本甚至預測講會倒頭槌。氣象專家是認為，登陸了後，因為挵著中央山脈，會繼續減弱，誠有可能會佇拜五中晝左右，變做是熱帶性低氣壓。
整合防災顧問公司總監 賈新興：「伊若減弱，對臺灣的影響會減輕，特別是風的影響，會減輕；雨水的部份，因為低氣壓仝款是反時鐘按呢絞，咱臺灣有中央山脈，所以花蓮臺東這爿山區的雨，仝款閣會繼續。」
專家也表示，風颱挵著陸地強度會減弱，但是猶原愛注意後續有大量的雨勢，基隆北海岸、東北角地區因為外圍環流的影響，雨水也會較厚，提醒民眾，雖罔風颱強度有減輕，出門嘛是愛注意安全。
記者 張佳倪 謝季潾 臺北報導
唐嘉良/編輯
