彰化鹿港地藏王廟修復彩繪 預估2025年完工

修復團隊詳細檢查廟內彩繪損害的情形，遮是彰化縣定古蹟－鹿港地藏王廟，因為廟是坐東看西、西照日嚴重，加上臺灣溼氣重、造成廟內彩繪起甲、必開，縣府爭取中央補助，欲來進行彩繪修復工程

修復團隊賴志豪，「彩繪的部份咱會請潘岳雄老師，國寶的匠師、伊的團隊，閣來做一擺的復刻，拍底的部份，咱嘛是請專業的李奕興老師團隊，來重新做拍底按呢。」

鹿港過去是商業港口，當年因為水路危險，袂少人生發意外過往，所致廟方會佇舊曆七月放水燈、渡水靈，《鹿港普度歌》歌詞有一句「初一放水燈」，講的就是地藏王廟，是地方重要的信仰中心

鹿港地藏王廟總幹事林慧娟，「咱鹿港是通港普，所以咱有一个普渡歌，初一放水燈、初二普王宮這个普渡歌，七月初一古早中門攏有拍開，就是欲予逐家來遮，方便來拜方便普。」

廟方表示，這陣因為環保政策，統一佇中元節大普，但猶是會當對普度文化，瞭解鹿港的開墾歷史。這擺的彩繪修復工程，總工程費1千1百95萬，文化部補助836萬，彰化縣府配合款大約300萬，賰的由地藏王廟負擔，工程預計2025年11月完工。