傳藝中心補助22个戲團 巡迴全臺220間學校
發布時間：
更新時間：
國立傳藝中心延續舊年的計畫，今年補助22个戲曲劇團，去全臺超過200間的學校巡迴演出，予各地頭的學生囡仔攏有機會欣賞戲曲。今年也增加計畫，佮6个地方政府合作，欲舉辦7場外台歌仔戲。
脫離戲曲的刻板印象，除了傳統歌仔戲的忠孝節義內容，唐美雲歌仔戲團加入新的元素，閣參現場的囡仔人互動，毋但予囡仔願意接觸傳統文化，也予劇團隨新時代的口味、做變化。
臺灣歌仔戲推廣基金會董事長，林茂賢表示：「過去想講看歌仔戲啦，看遮的南管北管，攏是敢若老歲仔人的專利。但是若按呢落去，咱的傳統戲曲可能會斷根。」
予囡仔看創新的戲曲表演，傳藝中心延續舊年的校園巡演計畫，補助22个歌仔戲、布袋戲、皮猴戲等等戲曲團隊，對這馬到11月，欲行入全台220間學校巡演，其中包括70間偏僻地區的學校。
文化部長，李遠表示：「行入校園，吸引囡仔人開始知影咱的傳統文化是啥，這比啥攏閣較重要。臺灣真濟劇團，一直保持真有性命力，咱必須愛提供真濟舞台予𪜶，予𪜶表演，𪜶才通繼續有新的創作。」
教育部師資培育及藝術教育司司長，武曉霞表示：「舊年的298間學校，有倚50%的學校，攏是咧愛駛車非常久，甚至閣愛坐飛行機到的小琉球，抑是山頂，予咱的囡仔攏通感受傳統戲曲的媠。」
請囡仔來看戲，除了延續舊年的學校巡演計畫，今年也增加「兒童歌仔戲」，參桃園、彰化、雲林、台南、屏東、佮台東6个地方政府合作，8月到11月，舉辦7場外台歌仔戲表演，希望傳湠臺灣傳統藝術，增加囡仔對文化的理解佮欣賞能力。
記者 郭柏均 謝季潾 臺北報導
陳怡臻/編輯
