鹿港店家煮食活動 台語繪本「十粒卵」做食譜

用趣味活潑的遊戲，予囡仔兄、囡仔姊了解雞母是按怎生雞卵的，彰化鹿港有店家，舉辦臺語煮食的活動，配合臺語繪本「十粒卵」的內容來料理，有雞卵糕、菜脯卵、閣有愛靠工夫的三色卵

「準備好矣未，咯咯咯，開始生卵囉」 

參加煮食的囡仔，「我今仔日欲做三色卵，這馬咧切皮蛋佮鹹卵。」

參加煮食的囡仔，「會使家己煮菜飯，有好耍。」

負責設計課程的Susan老師表示，雞卵是生活中真捷看著的食材，透過繪本佮體驗活動，予囡仔對食食有基礎的概念，食譜的教材也特別用羅馬拼音來寫，予囡仔人來唸看覓

課程老師 蘇珊，「伊愛看我的食譜內底寫啥物，這改我有較特別用心寫食譜內底，有一寡咱的羅馬拼音佇內底，予ﰀ去看彼个欲按怎唸，做出來的料理是啥物味按呢。」

家長，「老師咧上課毋是干焦煮食爾，像事先伊就會用台語的繪本，囡仔對這个料理的過程是足熟悉的，袂講感覺足生份按呢。」

囡仔人對攢料開始，佮父母做伙完成料理，滿滿一塊桌，有甜的也有鹹的，食家己煮的料理也感覺特別好食、有滋味，參加活動的家長表示，營造友善的語言環境是真重要的，透過浸水式的課程，予囡仔人毋但學做菜、嘛講台語，是真好的學習經驗。