勞發署用AR科技舉辦職訓 規畫相關產業課程

學生掛VR目鏡，邊仔的老師看螢幕做出指導，這是勞動部勞動力發展署基隆訓練場拍電龜訓練課程中使用的AR模擬設備，訓練師講，傳統拍電龜的訓練愛佇真熱的空間，實際操作火屎閣會四界噴，結合AR主要是降低實作訓練的成本，佇教學上，嘛比以早一陣人圍咧看清楚真濟。

基隆職訓場銲接助理職訓師翁敏富表示：「咱若是改用VR或者是AR模擬設備，當然咱會當減少一寡成本，猶有減少一寡耗材，以及一寡安全性的問題，模擬的方式呈現佇螢幕，就真清楚，會當佮同學做討論。」

除了教學上引入科技應用，勞發署對舊年開始，嘛實施「連結重點產業用人需求佮青年就業實施計畫」，開設這幾年重點發展產業，親像智慧機械、IC設計、太陽光電等產業相關的人才培訓課程，勞發署就業服務組講，IN透過佮產業實際的接觸，發現目前科技相關的產業是較欠人，IN一方面掌握業界的需求，一方面嘛媒合學員進入新興產業來就業，望改善目前新興產業人才無夠的問題。

勞動力發展署就業服務組組長吳淑瑛表示：「咱(計畫中)這个重點產業，大概就是未來產業的趨勢，所以伊本身的設定，就有科技佮新進產業的部份，推動到這馬，咱去收集一寡職缺，目前大概是智慧機械，看起來職缺是較濟。」

台灣這幾年產業快速轉型，勞發署講，新興產業需要閣較濟人才，IN開設遮的課程，上主要是幫助想欲投入新興產業的少年人免驚無學習經驗，予新興產業的發展會當更加順利。