「臺南特有種」展覽 對早前文物了解工藝演變
發布時間：
更新時間：
工藝是歷史，是文化，是臺灣寶貴的資產。臺南新營文化中心這馬就有咧辦一个「臺南特有種」當代工藝展覽，毋但有囡仔人愛耍的走關活動，嘛有安排工藝體驗、大師演講，望予逐家了解著工藝藝術文化的媠。（這條新聞導言、標題、內文是台語文。）
大人囡仔咧看這幅台灣府城街路地圖，當咧揣清代時期出現啥物款的工藝，這是臺南文資處辦的「臺南特有種」展覽的走關活動，欲予民眾那耍那認捌工藝的多元性。展覽分兩區，通看著對史前文物到當代工藝的演變。
囡仔：「(我學著)較早無印刷機用雕刻才印起去，然後印好的符仔會使鎮煞保平安。」
家長：「較早到這馬歷史的文化，猶閣有文化的傳承，若提早接觸著，嘛會當培養 In 的興趣。」
臺南市文資處無形文化資產組長 鄭羽伶：「咱有遮的歷史背景，產生咱臺南特別風格的工藝作品，所以阮才共喝臺南特有種。」
時代演變一點一滴累積落來，才有這陣特有的工藝文化，總計展出六種的無形文化資產。像眼前這頂永川大轎是王永川做的，臺南超過一半的神轎攏是來自永川工藝社；另外威風凜凜的門神，每一塊的線條攏有無仝的風格，其中潘氏家族替臺灣彩繪工藝留下濟濟作品，第三代潘岳雄嘛公開 In 老爸潘麗水彩畫的兩大特色。
國寶級廟寺彩繪大師 潘岳雄：「(門神)一定愛有七倍，你若門懸度無夠，無法度用到七倍。上重要是這个面，因為阮老爸有佇戲院畫kha̋ng-páng，伊畫的面較立體，喙鬚愛畫甲飄飄按呢，會當閣看著內底，(目睭)愛畫甲行到佗看到佗。」
民眾：「這畫起來足幼路的，毋是講清彩畫畫咧，門神其實愛畫出伊的威嚴莊嚴。」
展覽展期到8月11，文資處指出，In 後續會閣辦工藝體驗，參邀請大師來演講分享內底的技巧，通予逐家認捌較深入的傳統工藝的媠。
陳稷安/編輯
