嘉義義竹粉鳥笭比賽起鼓 8庄頭互相拚輸贏

主人共手攑懸，揹木笭粉鳥連鞭就對天頂飛出去，嘉義縣義竹鄉的庄頭佮庄頭之間，逐年佇這段田園較閒的時間，攏會舉辦粉鳥笭的比賽。

參加民眾宋先生講:「對細隻開始培養到大隻起來，大隻了後掠起來，去對方的庄頭來練習，練習予足在，才開始揹笭，對細粒笭練到大粒仔，對對方的庄頭放轉來。」活動主持人講:「粉鳥欲揹進前，會佇粉鳥的尾溜後壁先紩一條線，會揣這之間的中心，這个點是粉鳥的尾溜的後壁，佇中心這个所在，然後這支竹仔就固定佇中心遮。」

除了紹介粉鳥按怎揹木笭以外，在地的囡仔嘛展現創造的木笭，仝款是義竹人的嘉義縣長翁章梁，嘛專工轉來參加這一年一改的粉鳥笭比賽。

嘉義縣長翁章梁講:「這个是義竹鄉誠重要的特色，已經有百外冬，會當講這馬猶是維持八个庄頭，兩个一組來比賽，這馬就是比賽粉鳥笭的時陣，會當來比賽粉鳥笭，就是田內底免無閒的時間，逐家來比賽，比賽粉鳥笭。」

義竹鄉公所表示，粉鳥笭的活動，毋但是各庄頭對飼粉鳥技術的展現以外，嘛希望透過活動，予在地的少年人對故鄉的文化加較了解佮認同，未來會當繼續傳承這百外年的農村文化。