左營中山堂改做劇場啟用 招16歌仔戲團演出

李靜芳歌仔戲劇團，佇台頂演出警察逐廖添丁的故事，紲落來猶有其他劇團，演出林投姐仔等等無仝的故事，國立傳藝中心這擺推出歌仔戲內台大捙拚，邀請全臺16團歌仔戲團，四月欲佇高雄中山堂演出，這也是中山堂重新修復了，頭一擺展演，由歌仔戲拍頭陣。

國立傳統藝術中心副主任陳修程，「歌仔戲是咱臺灣最本土原生的劇祖，所以講文化部非常重視歌仔戲這塊，所以未來咱佇遮，就是欲做傳統戲劇的培育基地，咱先以歌仔戲拍頭陣。」

左營中山堂過去是海軍藝文空間，也是戰後，高雄營業上久的電影院，這馬成做高雄市歷史建築，經過五六冬，今年總算修復完成。這擺的歌仔戲內台大捙拚對四月開始，每禮拜假日，16團歌仔戲團，連紲欲演出32場，唐美雲老師講，這改青年團演出，是將共臺北展演的戲劇，全部徙來高雄，予南部鄉親也通欣賞。

唐美雲歌仔戲劇青年團團長唐美雲，「阮這改青年團，IN特別為著這改開幕，帶來經典好戲《曲判記 》，也希望共臺北佇戲劇院，演出的規格佮幼路的好戲，紮來高雄，予咱高雄的鄉親看。」

左營中山堂重新整修了後，這馬是成做中山堂劇場，國立傳藝中心表示，未來除了戲劇演出，也會培育傳統戲劇人才，向望成做南臺灣傳統藝術的培育基地。