對布袋戲尪仔看藝術 彰美館展出徐柄桓作品

霹靂布袋戲電影–聖石傳說的素還真、魔魁、閣有雲州大儒俠的史艷文、藏鏡人等等真出名的布袋戲角色，攏是徐柄垣大師的作品，目前當佇咧彰化縣立美術館展出

參觀民眾，「五年級猶是六年級，攏是看布袋戲大漢的，做一个展覽予咱這馬的少年輩來看，逐身攏刻了真媠。」

參觀民眾，「足趣味的，因為有西遊記，唐三藏佮豬八戒，攏是較早細漢時陣看著的故事。」

徐柄垣藝師16歲開始刻布袋戲尪仔，捌佮布袋戲大師黃俊雄合作，後來霹靂布袋戲當中濟濟有名的人物角色，嘛攏是徐柄垣的作品，尤其伊佇尪仔目睭、喙，活動的機關改良，落真大的工夫，予尪仔動起來會當活精氣神。

策展人吳印森，「伊佇鏡頭咧演出的時陣足活的，像黃俊雄 黃文擇愛用伊的尪仔，主要就是尪仔過鏡媠，才會用伊的尪仔，閣來就是雕刻的工夫真細路。」

徐柄垣兒子，「徐世昌、黃俊宏來欲刻尪仔的時陣，就共阮爸爸講緣投緣投、無錢的書生，伊就講像恁囝按呢啦，外口就講史艷文就是，看ﰀ囝刻的按呢。」

徐柄垣藝師是臺灣布袋戲誠有代表性的刻尪仔師傅，伊行過傳統、金光、電視，甚至電影布袋戲，這擺展出來自全台灣十位收藏家，將近八十身的布袋戲尪仔，希望予民眾看著徐柄垣藝師精彩的雕刻功夫。