「黑熊學院」辦演習模擬戰爭 加強民防、急救智識

隊員當咧討論：「所以你敢知影咱愛去佗位？」
「知，就是遮。」
「好好好。」
「咱是大概往128吧。」

隊員斟酌研究地圖、揣方向，確認家己愛向佗位行。

防空警報雄雄開始霆，所有人員攏囥下手邊仔的工課，蹲落、掩耳仔避難。
這是民間團體黑熊學院辦的活動，目的是予已經上過基礎民防智識的學員，有一擺模擬戰爭狀況的演練。

學員講：「因為我以前有參加過基礎訓練營，想講來參加活動通較有算是共學過的物件，看敢通應用，抑是有臨場的感受。」
另一个學員也講：「最近天災人禍較濟，希望透過訓練的過程，訓練家己的危機意識。」

毋通看𪜶只是咧解任務，若像真簡單，落尾閣有更加困難的關卡、愛𪜶發揮。

臺語台記者郭柏均：「若是佇戰爭當中，拄著大量傷患欲按怎做？佇這擺的活動當中，也攏有實際演練。」

學員喊：「敢有人通來鬥扛軟轎？」
「會使會使」
「敢通有一陣人來鬥相共？
「一陣人一陣人 來」
 

四界攏是傷患，有的輕傷、有的流血流滴、有的已經無意識。隊員愛分工一个一个確認狀況，按照著傷的嚴重程度分類急救。黑熊學院目的是希望，學員愛有臨場反應的才調。

黑熊學院執行長何澄輝講：「𪜶有一寡基礎的急救、閣有避難的規畫等等的技能，但是這寡技能佇戰爭的時、抑是戰爭情境，其實是千變萬化的，所以咱模擬一寡上主要的情境。」

黑熊學院講，𪜶的訓練分做軍事智識普及、資訊情報戰、急救技術、避難才調四大領域。紲落來也會繼續推動閣較濟課程，望民防智識通佇民間普及。