高雄青年「龐克」樂團 歌詞全臺語、唱出現代人心情
發布時間：
更新時間：
由高雄三位在地青年組成的臺語龐克樂團，鯊魚娃娃機，in成立三年，in的作品也攏唱出上班青年的心聲，in這擺參加高雄市青年局舉辦的音樂製作計畫，推出新作品欲發表，咱做伙來欣賞。（此則新聞標題、導言、內文皆為臺語文。）
樂團表演新歌long time no see：「希望有日佮阮來聚集，逐家講起過去的代誌，逐家做伙歡喜。」
這首歌敢有唱出你的心聲？原本佇學校佮朋友感情誠好，畢業了後辦同學會，朋友煞無來幾个，in是台語龐克樂團鯊魚娃娃機，這三位青年日時攏是上班族，下班了後就變身樂團成員，原本in攏是無仝樂團，三冬前才組這支台語龐克樂團，團長表示講，因為龐克音樂就是熱血的感覺，用台語唱就是有這款氣口。
鯊魚娃娃機團長游家欽強調，「而且阮是龐克rock，用臺語寫歌會較有彼个power，彼條歌就是欲寫予，你愛珍惜你身軀邊的朋友，後擺你看著伊就愛大聲講，Long time no see。」
雖然愛情誠重要，毋過人生抑是有更加重要的代誌，這是鯊魚娃娃機歌曲的風格，in三个人分別是主唱、貝斯手佮鼓手，佮其他樂團的歌曲較無啥仝款，in的歌較倚近生活，毋管是有關著身體健康抑是以上班族為主題，唱出真濟人的心晟，表演也充滿活力。
鯊魚娃娃機團長游家欽講：「阮無想欲寫有愛情的物件，阮就寫較生活、上班、朋友之間的代誌。」
鯊魚娃娃機上新發表的這首long time no see，是參加青年局舉辦的音樂計畫，由專業的老師指導完成，這首歌曲欲佇11 12兩工，佇高雄流行音樂中心頭一擺發表，向望逐家做伙感受台語龐克的魅力。
洪家馨/編輯
