高雄舊市議會荒12冬 都更改商辦、修復議事廳

這棟建築物看起來舊漚，真有歷史，高雄人應該攏無生分，這棟是高雄舊市議會，佇民國55年興建，使用44冬，自從高雄縣市合併了後，民國99年市府將市議會徙到鳳山，佇109年將舊市議會登錄做歷史建築，毋過舊市議會閒置到今，嘛已經超過12冬。

高雄市市長陳其邁表示，「原來佇1966年，舊高雄市議會的舊址，一方面嘛保持，這原來的歷史佮文化。」

為著欲活化舊市議會，高雄市政府舉行公辦都更招商，由台灣人壽得著優先申請人資格，in按算欲用77億經費，興建地下4層樓、地面頂26層樓的商辦大樓，未來這棟樓會提得綠建築黃金級、耐震等等5大認證標章，這嘛成做高雄頭一例文化都更的案例。

台灣人壽保險公司董事長 鄭泰克說明，「這是高雄，應該會是高雄第一棟，得著五个標章的建築物，所以伊會是高雄新的地標。」

根據初步的規劃，雖然欲將舊市議會改建做金融大樓，早期的議會辦公廳猶原會保留，日後修復做民主議事廳，予民眾參觀，按算2030年完工，向望會當保留原本的歷史風貌，嘛帶動周邊商業的發展。