國慶大典邀請金獅陣 傳統藝陣連2年上台表演

拍鑼挵鼓鬧猜猜，𪜶當咧箍陣拍箍，準備欲拍拳做練習。臺灣傳統藝陣百百款，舊年國慶大典邀請西港刈香的3隊武陣，包括寶安宮代天府白鶴陣、西港廣慈宮佮興安宮的金獅陣，若今年嘛頭一改予人邀請上北表演的本淵寮朝興宮的金獅陣，對1920年成立到今傳承104冬，上起早是用守護地方，後來煞變成神明的陣頭。閣賰無一個月欲正式上場，廟方表示，𪜶全莊攏動員起來，一禮拜練四改真綿爛練習。

朝興武館成員講：「來遮練習金獅陣阮欲上臺北表演，練這嘛會使當做是運動佮歇睏的活動。」

本淵寮朝興宮金獅陣督陣蔡文隆講：「阮的特色是阮是數代傳承，阮包括對老中青按呢訓練，攏是一代過一代直直共傳落來。」

本淵寮朝興宮的獅頭是用錫落去做的，在地人攏叫獅祖。廟方講，𪜶開館到今無咧謝館，平常時獅祖就囥佇廟予人參拜，若有出陣加加請一隻。毋過，特別的是，這改國慶大典當天會使一改看著三隻獅祖出門的景象。

本淵寮朝興宮主委顏國在講：「這个獅頭表演一般攏是，一隻獅一隻獅祖咧𤆬爾，罕咧百年有一改機會，所以才有這改參加國慶，按呢有三隻獅祖來出門，這是非常的難得。」

金獅陣佇西港刈香武陣是黃跤巾系統，每一个跤巾的跤法拳路攏有無仝的特色，𪜶將佇後個月國慶，帶來七分鐘的精采表演，欲予全國看著百年金獅陣出陣的威風。