新竹動物園攢好料辦普渡 追思過往的動物
發布時間：
更新時間：
舊曆七月各地頭攏會辦普渡，佇新竹動物園也準備動物平常時仔愛食的菜蔬果子，共動物園內面往生的動物辦普渡，表達對in的追思佮感謝。（此則新聞標題、導言、內文皆為臺語文。）
攢好動物平常時上愛食的青菜水果，閣有一包一包的飼料，遮的準備普渡拜拜的物件，是為著欲感謝過去佇動物園內生活過、過往的動物。
新竹動物園園長楊礎遠：「阮準備各種無仝動物食的飼料，親像鳥類、爬蟲類、飼奶動物的飼料、閣有牧草、有新鮮的、有焦草、閣有水果，主要就是予逐家來紀念懷念動物。」
清大人類學研究所副教授呂玫鍰：「這就是表示人佮人之間的關係，已經擴大到人佮動物的關係，所以這背後是一个，萬物(動物)皆有靈 佮人的意思仝款。」
動物園講過去這寡動物，就親像親人仝款，所以希望IN佇另外一个世界也會當食飽飽過著好生活。學者表示不管是普渡好兄弟抑是動物，其實攏是代表尊重性命。
清大人類學研究所副教授呂玫鍰：「咱的民間風俗信仰內，包含咱愛好好仔善待世間萬物，包括咱無熟似的生份人(鬼)，當然閣有另外一个原因，就是逐家攏相信，鬼月有真濟禁忌，若是無好好對待，這寡好兄弟，有可能會來侵犯，抑是帶來歹運。」
除了動物園，中元這工佇新竹科學園區嘛會當看著，廠商逐家攏佇門口，無閒準備普渡的物件，希望用上誠意的心來祈求平安順序。
洪家馨/編輯
