予藝術入到偏鄉 文化部「庄頭劇場」10縣市巡演

演員當咧台頂比武、跤手扭掠，疫情期間、濟濟劇團攏無法度表演，到現此時生活恢復正常，演員也通重新開始行上舞台。這陣文化部舉辦庄頭劇場巡演活動，邀請台灣出名劇團，到各縣市舉辦表演。

文化部長史哲表示﹔疫情對全世界表演藝術產生真大的衝擊，毋但(生活)愛恢復正常，感動也愛恢復常態，這擺演出的劇用八个字來講，是臺灣的經典、世代的精選。

親像這擺的巡演，就邀請出名劇團「明華園戲劇總團」，in欲搬的戲，是演一擺就愛出動300人的「超炫白蛇傳」。

明華園戲劇總團孫翠鳳﹔上經典的「水漫金山」主舞台咧表演、花道咧表演、觀眾席咧表演，天頂除了會噴水以外，閣有白蛇、青蛇予人吊咧10層樓懸。

另外唐美雲歌仔戲團，也會到歌仔戲的故鄉—宜蘭，演出in的出名戲「天鵝宴」。

唐美雲歌仔戲團團長唐美雲﹔這齣戲佇以前就得著電視金鐘獎，過去兩年阮重新製作。
這擺的巡演計畫對8月開始到年尾，會有10个大型劇團，各tshuā領5个小型劇團，分別到10个縣市演出；文化部表示，計共60个劇團參與，除了希望表演藝術通佇疫情了後恢復正常，也達到文化平權的效果。